เอกุตฺตริกนโย ฉกฺกวารวณฺณนา

[326] ฉกฺเกสุ เอวมตฺโถ เวทิตพฺโพติ โยชนาฯ อิตีติ เอวํฯ อิมา ฉ สามีจิโยติ โยชนาฯ ตตฺถาติ ฉสุ อากาเรสุฯ สติสมฺโมเสนาติ สติยา วิปฺปวาเสนฯ

ตตฺถาติ จุทฺทสสุ ปรเมสุฯ ตโตติ ฉกฺกโตฯ เอกํ อปเนตฺวาติ ยํกิญฺจิ เอกํ อปเนตฺวาฯ เสเสสูติ ฉหิ ปรเมหิ เสเสสุ อฏฺฐสุ ปรเมสุฯ อญฺญานิปิ ฉกฺกานีติ ปฐมฉกฺกโต อญฺญานิปิ อฏฺฐ ฉกฺกานิฯ

ฉ อาปตฺติโยติ ตีณิ ฉกฺกานีติ ‘‘ฉ อาปตฺติโย’’ติ วุตฺตานิ ตีณิ ฉกฺกานีติ โยชนา ฯ วุตฺตทฺวยํ เอกํ กตฺวาฯ นฺหาเนติ นฺหานสิกฺขาปเทฯ ฉกฺกทฺวยนฺติ อาทายสมาทายวเสน ฉกฺกทฺวยํฯ สพฺพตฺถาติ สพฺเพสุ ฉกฺเกสุฯ

อิติ ฉกฺกวารวณฺณนาย โยชนา สมตฺตาฯ

เอกุตฺตริกนโย สตฺตกวารวณฺณนา

[327] สตฺตเกสุ ฉสุ สามีจีสุ ปกฺขิปิตฺวาติ สมฺพนฺโธฯ ตตฺเถวาติ สมถกฺขนฺธเก เอวฯ

จมฺเปยฺยเกติ จมฺเปยฺยกฺขนฺธเกฯ ‘‘อสทฺธมฺมา’’ติ ปทสฺส เภทนิสฺสิตตุลฺยนิสฺสิตสมาสํ ทสฺเสนฺโต อาห ‘‘อสตํ ธมฺมา’’ติอาทิฯ ตตฺถ ‘‘อสตํ ธมฺมา’’ติ อิมินา เภทนิสฺสิตสมาสํ ทสฺเสติ, ‘‘อสนฺโต วา ธมฺมา’’ติ อิมินา ตุลฺยนิสฺสิตสมาสํ ทสฺเสติฯ สพฺพตฺถาติ สพฺเพสุ สตฺตเกสุฯ เสสํ สุวิญฺเญยฺยเมวฯ

อิติ สตฺตกวารวณฺณนาย โยชนา สมตฺตาฯ